Adrianonu xatırlayırsınız?

AzxeberSport Rio de Janerioda bir “favela”da böyüyən və futbol superstarı olan Adrianonun həyatını təqdim edir:

Futbolçuluq karyerasına “Flamenqo”da başlayan Adriano qısa müddətdə bütün diqqətləri öz üzərinə çəkməyi bacarır. 2001-ci ildə "İnter"ə transfer olan Adriano ilk vaxtlarda elə də uğurlu çıxış edə bilmir.

Bu səbəbdən də “İnter” icarə əsasında Adrianonu “Fiorentina”ya verir, Bundan sonra “Parma”ya transfer olan braziliyalı 9 oyuna 8 qol vurduqdan sonra bütün futbol dünyası Adrianonu yeni Ronaldo adlandırmağa başlayır. 

“İnter” əvvəlki oyunçusunu 2004-cü ildə geri qaytarır. Bundan sonra ulduzu parlayan Adriano Braziliya millisi ilə də uğurlar qazanmağa başlayır.

Adriano bir anda dünyanın ən istedadlı hücumçularından birinə çevrilir. Sabiq hücumçu güclü, sürətli, bitirici zərbəsi ilə hətta PES6 oyununun üz qabığı olur.

Ancaq atasının aldığı xəsarətlər və ölümü Adrianoya ağır təsir edir. Oyunçu bundan sonra içkiyə aludə olur və buna görə də tezliklə formasını itirir,

"İnter"dən sonra vətəni Braziliyaya qayıdan Adriano yenidən "Flamenqo"da çıxış edir. Ancaq o ulduz oyunçudan əsər-əlamət qalmır.

Karyerasına "Atletiko Paranense"də son qoyan Adrianonun indiki həyatı..

38 yaşlı braziliyalı, hazırda doğulub boya başa çatdığı, futbol oynamağı öyrəndiyi Rio-de-Janeyroda favelasında yaşayır.

Gününü içki ilə açıb-bağlayan Adrianonun yaxınlarının dediyinə görə, keçmiş oyunçu səfil həyatı yaşayır. O favelada jurnalistlərdən və onu başa düşməyən insanlardan qaçır.

İnanmaq çətin olsa da, hazırda keçmiş ulduzu adi bir yoxsul dilənçidən ayırmaq çətindir.

Braziliya mediası hesab edir ki, Adriano narkotik ticarəti ilə məşğul olan və bir çox cinayətlərdə iştirak edən ən nüfuzlu yerli dəstələrdən birinin fəaliyyəti ilə əlaqədardır. Onun ətrafında indi 3 şey var: qızlar, içki və narkotik.

2016-cı ilin may ayında Adriano hətta AK-47-nin qanunsuz alınmasına və sahiblənməsinə görə məhkum edilib və narkotik alverində şübhəli bilinib.

Adriano meydanda əsl mübarizə aparan əzmkar futbolçu idi. Dövrünün ən güclüsü olan Adriano hər kəsə qalib gəlsə də, içki və narkotikə məğlub oldu. Alkoqol və yanlış mühit istedadının üçdə birini belə dərk etməyən hücumçunu məhv etdi.