"Milli son oyunda yaxşı çıxış elədi. Əvəvlki 3 matça baxaraq, 1-ci dəqiqədən 90-ci dəqiqəyədək stabil futbol oynadı. İsveçlə belə deyək ki, ilk 20 dəqiqədə yaxşı futbol oynadısa, bundan sonra komanda tam düşdü, səhvlərə yol verdisə, Estoniyaya qarşı ilk hissədə bərbad, fasilədən sonra yaxşı oynadıq. Həm topa nəzarətdə, həm də hücum baxımında uğurlu çıxış etdik. Bu dəfə isə 90 dəqiqə öz oyununu göstərə bildi millimiz".

Bu fikirləri Sport24.az-a açıqlamasında Azərbaycan milli komandasının baş məşqçisi Şahin Diniyev deyib.

Millimizin AVRO-2024-ün seçmə mərhələsində Belçika yığmasına "Dalğa Arena"da 0:1 hesabıyla yenildiyi matçı dəyərləndirən təcrübəli mütəxəssisin fikrincə, ən əsası, taktiki baxımından savadlı, ağıllı oynadıq: "Komanda nə etmək istədiyini bilirdi - həm müdafiədə, həm də hücumda. Həm də Belçika kimi güclü yığmaya qol şans vermədi. Rəqib meydanda tam dominantlıq edə bilmədi. Bu sarıdan cari tsikldə millinin ən yaxşı oyunlarından biri idi. Ümid edirəm ki, belə davam edərsə, növbəti rəqiblərimizdən xal götürmək şansımız artıq daha çoxdu".

Diniyevin sözlərinə görə, ustalıq və keyfiyyət məsələsi var ki, bunlar nəticəni müəyyənləşdirməkdə həlledici olub: "Bilirsiniz ki, Belçika yığmasında ustalıq səviyyəsi yüksək olan keyfiyyətli futbolçuların sayı çoxdu. Onlar da hər kiçik səhvdən msksimum istifadə edə bilirlər. Soyuqqanlıq, ustalıq, keyfiyyət - bu, bizdə çatışmadı. Gördüz ki, rəqibin qolu da kuryoz bir qol alındı. Yəni, böyük komandalar kiçik bir səhvdə istifadə edərək matçı taleyini həll edə bilirlər. Lakin bu, bizdə yoxdu".

Məlumdu ki, matçda start heyətdə Diniyev oğlu Coşqun da yer almışdı. Ata bunu gözləmədiyini etiraf edib: "Çünki indiyədək əsas heyətdə oynamamışdı. Səhv eləmirsə, bir dəfə ilk dəqiqələrdən çıxmışdı. Bu da Qurban Qurbanovun baş məşqçiliyi vaxtında Belarus yığmasıyla yoldaşlıq görüşündə idi. Axır vaxtlar da Azərbaycanda oynadığı müddətdə millidə əsas heyətdə yer almırdı Coşqun. İlk dəfə legioner kimi çağırıldı. Məşqçi kimi düşünmürdüm ki, bu qarşılaşmada oynaya bilər. O mənada ki, bunu ikinci hissədə gözləyirdim. Coşqun çoxdandı millidə yoxdu, millidə də çoxdandı başqa heyətdə oynayır. Bu konteksdən də başa düşmək olar, problem yox idi. Ancaq start heyətdə çıxacağı bir gün qabaq bildim və buna çox şad oldum. Oğlumla belə danışığımız oldu ki, milli qürur, şərəf yerimizdi, meydanda hər millilmetr uğrunda vuruşmalısan. Yəni, belə bir söhbətimiz oldu. Fikrimcə, Coşqun klubda yox, millidə ən yaxşı oyunlarından birini oynadı. Ən başlıcası, taktiki cəhətdən savadlı oynadı, Belçikanın ortada hegemonluq etməsinə imkan vermədi. Problemlərimiz həmişə ortada olurdu, topa nəzarət edə bilmirdik, üstünlüyü verirdik rəqibə. Amma bu dəfə millimiz ortada dominantlıq, topa nəzarət edirdi. O baxımdan Belçikada bunlar olmadı. Ortada oynayan həm Coşqun, həm Aleksey İsayev, həm də Emin Mahmudov çox yaxşı çıxış edərək, rəqibə dominantlıq etməyə imkan vermədilər".

Məlumdu ki, rəqib tək qolu məhz Coşqunun top itkisindən sonra vurdu. Maraqlıdı, həmsöhbətimiz ata yox, təcrübəli mütəxəssis olaraq oğluna həmin epizodla bağlı nə irad bildirib: "Vatsapda yazdıqlarımı da sizə sözbəsöz deyə bilərəm - dedim ki, bu gün çox yaxşı oynadın, mübarizə apardın, özünəinamlı idin, taktiki cəhətdən mübarizələri uduzmurdun - bunlar hamısı yaxşı. Kaş o bir səhv olmazdı...O səhvin olmasaydı, sənə 10 ballıq sistemlə 10 bal qiyməti verə bilərdim. Amma əfsuslar ki, 10 yox, 9 verə bilirəm. Bu, həm zarafatyana, həm də ciddi bir söz idi. Gərək o andda arxaya yox, qabağa gedərdin, irəlidə top itərdi. O da mənə dedi ki, topu artıq götürmüşdüm. istədim onu özümdə saxlayım. Belə bir danışığımız oldu. Dedim ki, istəyinlə reallıq üst-üstə düşmədi, çox heyf...Kaş o biri vəziyyətdə qoldakı səhvini yuyardın, o uzaqdan zərbə qapıya girərdi. İstənilən halda, belə də davam elə, səninlə fəxr edirəm. Bax, belə söhbətimiz oldu".