"Kəpəz"in seneqallı futbolçusu Latir Fal klubun mətbuat xidmətinə açıqlama verib.

AzxeberSport Futbolpress.az-a istinadən xəbər verir ki, yarımmüdafiəçi Gəncə təmsilçisinə uyğunlaşmasından danışıb:

"Bura gəlmək, klubun bir parçası olmaq mənim üçün xoşdur. Kollektivə uyğunlaşıram, komanda olaraq inkişaf edirik. Komandamızda yaxşı futbolçular var. Həm yerli, həm də əcnəbi oyunçulardan təşkilatlanmış heyətimiz var. Məşqlərdə çalışırıq, üzərimizə düşənin ən yaxşısını etməyə çalışırıq".

29 yaşlı futbolçu hədəflərindən və azarkeşlərlə münasibətlərindən söz açıb:

"Məsuliyyətliyik, məqsədimiz özümüzü azarkeşlərə yaxşı göstərmək, komandanı irəli aparmaqdır. Azarkeşlərin oyunumu necə qiymətləndirdiyini bilmirəm, amma sevilirəm, isti münasibət göstərirlər".

"Kəpəz" Latiri bu yay heyətinə qatıb. Seneqallı futbolçu "sarı-göylər"də 2 oyuna çıxıb.